Kameroenees hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Kameroenees hierevoetbalèlftal (bijnaom Les Lions Indomptables 'de oontembaar liewe') vertreujt Kameroen in internationaol voetbalmatche. 't Team huurt al jaore bij de sterkste vaan Afrika, zeker vaan Afrika bezuie de Sahara. Kameroen heet de Africa Cup neet minder es vief kier gewonne en maakde groeten indrök op 't WK vaan 1990.
Historie
[bewirk | brón bewèrke]In 1956, nog in de koloniaolen tied, woort in Frans Kameroen e nationaol èlftal gestiech. Umtot Frans Kameroen wiedoet 't groetste deil vaan 't huieg land umvat, rekent me dit èlftal es de veurluiper vaan 't huieg team. In d'n ierste match woort mèt 3-2 verlore vaan Belsj-Congo.
In 1970 plaotsde Kameroen ziech veur 't iers veur de Africa Cup. Twie jaor later, wie 't evenemint in eige land waor, wis 't de daarde plaots te hole. Nao tien jaor vaan druugde waor 't land in 1982 weer presint. Ouch plaotsde Kameroen ziech toen veur 't WK, boe 't al-evel neet wijer kaom es de grópsfaas. In de jaore die volgde góng 't land 't Afrikaons voetbal zoeget compleet dominere: in 1984 en 1988 wonne ze de Africa Cup, dewijl ze in 1986 twiede woorte. Te vreemder waor tot 't WK vaan 1986 misgeloupe woort. 't WK vaan 1990 woort wel gehaold. Nao iers grópswins (in 'n sterke poule mèt oonder mie regerend kampioen Argentinië, wat mèt 0-1 woort geklop) woort in de achste finaal Colombia verslage, boenao in de kwartfinaal oetindelek Ingeland zjus te sterk waor.
Nao 1990 waor 't mèt de dominantie in Afrika wel veurbij. Väöl mie len hadde de fysieke späölstijl euvergenome, boedoor 't land neet zoe sterk mie bove de res oetstaok. Ouch op WK's woort de stunt vaan 1990 neet herhaold: 't land waor gemeinelek wel presint meh raakde neet veurbij de grópsmatche. In 2000 en 2002 woort Kameroen toch weer Afrikaons kampioen, meh dees opleving doort neet laank. Veural de vreug oetsjakeling op 't WK vaan 2010 - 't ierste oets in Afrika - veel tege. In 2014 haolde 't land ouch al zoe'n slechte prestatie. Tegeneuver e nui Afrikaons kampioensjap in 2017 stoont 'n absentie op 't WK vaan 2018. Veer jaor later haolde Kameroen de indrunde wel weer.